དེ་བཞིན་བོད་རྒྱལ་ཁབ་ཆེན་པོའི་མཐའ་དབུས་ཁོར་ཡུག་གངས་རི་དང༌། གནས་རི། རྩྭ་ཐང༌། ཆུ་ཆེན། མཚོ་དང་མཚེའུ་སོགས་ཀྱི་གནས་བབས། རི་ཀླུང་སྐམ་གཤེར་དུ་གནས་པའི་སྲོག་ཆགས་སྤྱི་སྒོས་ཀྱི་རྣམ་གྲངས་དང་རང་བྱུང་ཁྱད་ཆོས་དང་འབྲེལ་བའི་ཁོར་ཡུག་སྲུང་སྐྱོབ་སྐོར། བོད་རང་གི་ཕོ་མོ་རྒན་དར་གཞོན་གསུམ་སོ་སོའི་རྩེད་མོའི་རྣམ་གྲངས་དང༌། རྩལ་སྦྱོང༌། ཡུལ་ལུང་སོ་སོའི་ཕོ་མོའི་ཆས་གོས་དང་རྒྱན་ཆའི་བྱེ་བྲག ལྷག་པར་གཞས་ཆེན་དང༌། གདངས་རིང༌། འཁྲུག་གཞས། ལ་གླུ། འབྲོག་གཞས། གླིང་སྒྲུང༌། འབྲས་དཀར་དང་རྦད་ལ་སོགས་པའི་བཤད་པའི་རྣམ་གྲངས། ཕ་གཏམ་བུ་འཇགས་ཀྱི་ཁ་ཤགས་དང་གཏམ་དཔེ། འདས་པའི་ལོ་རྒྱུས་མཚོན་ནུས་ཀྱི་དཔྱད་གཞས་དང་རྒྱག་གཏམ་གླུ་ཤགས་སོགས་མདོར་ན་བོད་མི་རིགས་ཀྱི་ཐུན་མོང་མ་ཡིན་པའི་རང་བཞིན་ཁྱད་ཆོས་དང༌། རྒྱུན་འཇགས་གོམས་གཤིས་བཟང་པོའི་ར་སྤྲོད་མཚོན་ངེས་བརྗེད་དུ་ཕངས་པ་རྣམས་ད་ཆ་མི་རབས་བརྗེས་དང་བརྗེ་མཚམས་སུ་གཏུགས་པས་སྔོན་རྗེས་རྒྱུན་མཐུད་ཟམ་པ་ལྟ་བུའི་འགན་ཁུར་ད་ལྟའི་མི་རབས་འདིར་འཁྲི་བ་རང་བཞིན་ཡལ་བོར་དུ་འཇོག་བློས་མ་བཟོད་པར་མཁས་མྱོང་གཉིས་ཅན་གྱི་རང་རིགས་བགྲེས་སོང་ཁག་རིམ་གཤེགས་ལོ་རེ་ཇེ་ཉུང་དུ་འགྲོ་བཞིན་ལ་བརྟེན། རྒྱ་གར་ལྷོ་ཕྱོགས་གཞིས་ཆགས་ཁག་དང༌། བལ་ཡུལ། འབྲུག་ཡུལ། ཀ་རྡོར་སྒང་གསུམ། དྷ་ས། སྤི་ཏི། ཀི་ནོར། ལ་དྭགས། མ་ནཱ་ལི་སོགས་བོད་མི་འདུ་སྡོད་ས་གནས་གང་སར་ད་ལྟ་འཚོ་བཞུགས་སེར་སྐྱ་བགྲེས་སོང་ཁག་ཆེད་དུ་གདན་ཞུ་དང༌། ཡང་ན་ཁུངས་སོ་སོར་མི་འགྲོ་ཆེད་བཅར་གྱི་ལམ་ནས་བོད་ཆོལ་གསུམ་རྒྱ་ཁྱབ་ཚང་མའི་ལོ་རྒྱུས་ཅི་རིགས་འཚོལ་ཞིབ་སྒྲ་འཇུག་བྱས་ཏེ་གསོག་སྒྲུབ་ལས་དོན་བྱེད་པོ་ངག་རྒྱུན་ལོ་རྒྱུས་སྡེ་ཚན་འདི་བཞིན་ཕྱི་ལོ་ ༡༩༧༦ ལོར་ཆེད་དུ་ཟུར་འཛུགས་གནང་བ་ལྟར། འགན་ཁུར་ཡིག་འབེབས་ཀྱིས་རང་རེའི་བོད་མིའི་སྤྱི་ཚོགས་ཁྲོད་དུ་དར་སྤེལ་སྔར་ལམ་རྒྱུན་འཇགས་འབྱུང་ཐབས་སུ་དེབ་ཕྲེང་རིམ་མཐུད་དཔར་འདོན་ཐུབ་ཐབས་ཁུར་བརྩོན་ཞུ་བཞིན་ཡོད། དེ་ཡང་ལོ་རྒྱུས་གསུང་པ་པོ་སོ་སོའི་མྱོང་རྒྱུས་དགོངས་ཚུལ་གང་གསུངས་སོར་བཞག་ཡིག་འབེབས་གུང་བསྒྲིགས་ཀྱིས་རྒྱ་ཆེའི་ཀློག་པ་པོའི་སྤྱན་ལམ་དུ་ཉམས་ཞིབ་དཔྱད་གཞིར་དཔར་འགྲེམས་ཞུ་རྒྱུ་ལས། བརྗོད་དོན་རྣམས་ལ་བཅོས་སྒྲིག་གི་འགན་དབང་སྤྱོད་ཀྱི་མེད།
འབྲེལ་ཡོད་མི་སྣ།
དབང་འདུད་ཚེ་རིང༌།
|
སྙིང་བསྡུས།
ཕྱི་ལོ་ ༢༠༡༥ ལོའི་གནས་བསྡུས།- ད་བར་བོད་མི་རྒན་རབས་མང་པོར་བཅར་འདྲི་སྒྲ་འཇུག་ཞུས་ཡོད་པ་དང། འདི་ལོར་ཀ་རྡོར་སྒང་གསུམ་དུ་ཆེད་བཅར་གྱིས་མི་སྣ་རྒན་རབས་སུམ་ཅུ་ལྷག་ཙམ་ལ་ངག་རྒྱུན་ལོ་རྒྱུས་བཅར་འདྲི་ཞུས།
- ཆོལ་གསུམ་མི་སྣ་འདྲ་མིན་གྱི་ལོ་རྒྱུས་སྣ་ཚོགས་དཔར་སྐྲུན་ཞུས་པ་ལས་ད་ལྟའི་ཆར་ངག་རྒྱུན་དེབ་ཕྲེང་ ༣༦ སླེབས་ཡོད།ཞིབ་ཕྲ་གཤམ་གྱི་དཀར་ཆག་ནང་གཟིགས་པར་འཚལ།